Laurel Brunner bespreek die argument tussen plastiek- teenoor papierverpakking en hul uitwerking op ons omgewing. Kan ‘n nuwe alternatief die antwoord wees?
Tans is daar baie bespreking aan die gang oor die negatiewe uitwerking van plastiekverpakking op die omgewing. Aan die een kant dryf daar tans 8 miljoen ton plastiek in ons oseane. Aan die ander kant het plastiek bewys dat dit ‘n baie doeltreffende verpakkingsmateriaal is, veral om voedsel onbesmet en vars te hou. Plastiek het ook ‘n lang rakleeftyd en is voordelig vir die vertoon van goedere en vir die vervaardiging van draersakke. Voorstanders van plastiekverpakking vir sakke, bottels, omhulsels, bakke en houers sal jou hiervan inlig en hulle beweer ook dat as ‘n ander materiaal soos papier of metaal gebruik word, die totale uitlatings vir energie en kweekhuisgasse sou toeneem.
Dit is in werklikheid moeilik om betroubare data te bekom wat dit ondersteun, maar dit is akkuraat dat plastiek lig in gewig is, daarom dra dit nie by tot vervoerkoste en die gepaardgaande uitlatings nie. Plastiek is ook betroubaar en duursaam, wat beteken dat voedselvermorsing verminder word: dink aan plastiek toegedraai teenoor los druiwe. Nietemin is dit ook waar dat verskeie produkte wat in plastiek toegedraai verkoop word, nie beskerming benodig nie: dink aan raapwortels en klappers. Die voordele van plastiek is talryk, maar daar is geen twyfel dat dit oorbenut word nie en daar is alternatiewe wat minder negatiewe uitwerking op die omgewing het.
Papiermaatskappye soos Stora Enso en Sappi het suksesvol groot vordering gemaak met die ontwikkeling van soortgelyke alternatiewe wat gebaseer is op houtpulp, ‘n hernubare hulpbron wat ook ‘n uitsonderlike koolstofvangmetode bied. Bome vang nie net koolstof vas nie, maar verbruik dit ook deur fotosintese, ‘n proses wat suurstof as ‘n afvalbyproduk produseer. Paptic is ontwikkel deur ‘n Finse opstartmaatskappy en dit kan moontlik in die toekoms beide plastiek en papier vervang. Paptic is ‘n papiergebaseerde materiaal wat volledig herwinbaar is en goed geskik is vir bestaande verpakkingslyne. Die ontwikkelaars daarvan sê dat dit “die volgende generasie papier is met al die voordele van papier gekombineer met die fundamentele eienskappe van plastiek soos hitteverseëlbaarheid.”
In reaksie op sulke inisiatiewe en verbruikersbekommernisse het die plastiekbedryf opgetree om die materiaal se omgewingsimpak te verbeter. Plastiek word meestal van olie gemaak, daarom is dit nie maklik om te herwin nie. Sommige plastiek kan egter herwin word en in nuwe plastiek verwerk word, terwyl die res verbrand kan word om energie op te wek. Die herwinbaarheid van plastiek hang af van die samestelling daarvan en die kompleksiteit van die betrokke polimere: byvoorbeeld, hoe minder in bottels, hoe beter. Verpakkings wat van ‘n kombinasie van bestanddele gemaak word, is moeiliker om in grondstowwe vir nuwe produkte te omskep.
Vir huishoudings in die VK wat jaarliks 1,7 miljoen ton verpakkingsafval genereer, word daar tans werk gedoen om afvalplastiek tot hul komponente te verminder om te verseker dat hierdie chemikalieë hergebruik kan word. Hierdie werk is in sy vroeë stadiums en tans besoedel plastiek steeds die waterweë en oseane.
Bron: Hierdie artikel is vervaardig deur die Verdigris-projek, ‘n bedryfsinisiatief wat bedoel is om bewustheid van drukwerk se positiewe omgewingsimpak te verhoog. Hierdie kommentaar help drukkersmaatskappye om op hoogte te bly van omgewingstandaarde, en hoe omgewingsvriendelike sakebestuur kan help om hul wins te verbeter. Verdigris word ondersteun deur die volgende maatskappye: Agfa Graphics, Spindrift.click, EFI, FESPA, HP, Kodak, Kornit Digital, Ricoh, Splash PR, Unity Publishing en Xeikon.